«Cun grond plaschair e motivaziun entschaiv jau mia nova rolla sco manadra dal team da perscrutaziun da la ISDU. Dapi mes emprim praticum tar l’organisaziun per dretgs umans humanrights.ch avant exactamain diesch onns, èn la protecziun ed il respect dals dretgs umans ils puncts essenzials da mia scolaziun, perscrutaziun e da mias activitads professiunalas. Jau m’engasch da purtar en Svizra mias experientschas interdisciplinaras ed internaziunalas en il sectur dals dretgs umans en num da la ISDU».

Ina posiziun unica ed in mix da metodas

«Grazia a la posiziun unica da la ISDU – ni stadi, ni economia privata, ni societad civila – sa stentain nus da far dumondas che n’èn enfin ussa betg vegnidas resguardadas. Nus vulain render attent a svilups da la societad che n’èn anc betg vegnids identifitgads, e realisar colliaziuns là nua ch’ellas mancan enfin ussa. Quai vegnin nus a realisar cun  agid d’ina perscrutaziun da basa cumplessiva che vegn ad esser en il focus durant ils emprims mais da nossa activitad da perscrutaziun.

Per elavurar da maniera fundada dumondas centralas recurrin nus ad in mix da metodas da las scienzas socialas - intervistas cun expert:as ed intervistas guidadas, evaluaziun ed analisa quantitativa da datas rimnadas – e cumbinain quellas cun las metodas da la scienza dal dretg.

Ultra da quai planisain nus il barat cun organisaziuns ed instituziuns naziunalas ed internaziunalas. Nus ans engaschain spezialmain per ina stretga collavuraziun scientifica cun las organisaziuns per ils dretgs umans da quels pajais, cun ils quals la Svizra ha ina ferma rait en connex cun commerzi, investiziuns e migraziun».

Perscrutaziun da basa en il servetsch dad intervenziuns concretas

«Nossa finamira è d’ina vart la perscrutaziun da basa. Nus vulain identifitgar e render visibels ils musters tant da la protecziun sco era da la violaziun dals dretgs umans entaifer ils quatter accents tematics. Noss focus è qua tar ils problems sistematics, tar correlaziuns structuralas e tar motivs pli profunds da violaziuns dals dretgs umans.

Da l’autra vart vegnin nus ad intervegnir en process politics e giuridics, sin fundament da la perscrutaziun da basa, tant tar acturs statals sco era tar interpresas e persunas singulas che pon influenzar  ils dretgs umans dad autras persunas tras lur posiziun da pussanza. Nossas intervenziuns vegnan ad avair differentas furmas, da Policy Briefs ed Amicus Curiae enfin tar proceduras d’audiziuns e da consultaziuns. Ultra da quai èsi nossa finamira  da render accessibla nossa perscrutaziun a la vasta publicitad, d’ans confruntar cun la critica da gruppas interessadas e dad acceptar propostas. Per promover quai planisain  nus ultra dad occurrenzas publicas regularas era collavuraziuns cun museums, organisaziuns da films ed instituziuns da furmaziun.

Jau ma legr, da pudair furmar ensemen cun il directur da la ISDU, Stefan Schlegel, in team da duas perscrutad:ras extraordinari:as cun experientscha per questas incumbensas pretensiusas.»